Prokuroria Themelore Publike (PTHP) informon se pas procedurës hetimore, ka dorëzuar akt prokuror kundër katër personave për veprën penale “prodhim i paligjshëm dhe lëshim në treg të lëndëve narkotike”.
Njëri nga të akuzuarit ndiqet edhe për veprën penale “përpunim i paligjshëm, mbajtje dhe tregti me armë”.
Nga Prokuroria thonë se bëhet fjalë për katër persona (tre meshkuj dhe një femër), në lidhje familjare, të cilët në një auto-servis në lagjen e Gjorçe Petrovit kanë mbajtur 133 kg marijuhanë.
“Në të njëjtën ditë, bashkërisht kanë organizuar bartjen e marihuanës, duke lëvizur me tre vetura njëra pas tjetrës – automjeti i parë për të njoftuar nëse ka patrulla policore, automjeti i dytë me drogë dhe vetura e tretë për mbrojtje. Kur policia i urdhëroi të ndalonin në rrugën ‘Skupi’, vetura e parë nuk ndaloi fare dhe i akuzuari u largua. Dy mjetet e tjera janë ndaluar menjëherë dhe gjatë kontrollit janë gjetur kutitë me drogë. Pas kontrollit në servisin e makinave, është gjetur pjesa tjetër e marijuhanës, por janë gjetur edhe katër fishekë, të cilat njëri nga të pandehurit i mbante pa leje”, thuhet në njoftimin e Prokurorisë Themelore Publike.
