Një tërmet tjetër ka goditur Afganistanin perëndimor, disa ditë pasi dy lëkundje të mëdha në rajon vranë më shumë se 1000 njerëz. Sipas Shërbimit Gjeologjik të SHBA-së (USGS), tërmeti me magnitudë 6.3 ra në afërsi të qytetit të Heratit. Deri më tani nuk ka raportime për viktima.
Në raportin e saj, USGS tha se epiqendra e tërmetit të fundit ishte 30 km në veri-perëndim të Heratit, qyteti i tretë më i madh i Afganistanit afër kufirit iranian.
Agjencia e OKB-së për fëmijë Unicef, tha se më shumë se 90% e atyre që vdiqën në tërmetet e mëparshme ishin gra dhe fëmijë. Tërmeti i së shtunës së kaluar goditi Zindajan, një lagje rurale rreth 40 km larg Heratit.
Afganistani është përfshirë nga një krizë ekonomike që nga marrja e pushtetit nga Talibanët në vitin 2021, kur ndihma e dhënë drejtpërdrejt qeverisë u ndal. Vendi goditet shpesh nga tërmete, veçanërisht në vargun malor Hindu Kush, pasi shtrihet pranë kryqëzimit të pllakave tektonike euroaziatike dhe indiane.
Në Qershor të vitit të kaluar, provinca e Paktikës u godit nga një tërmet me magnitudë 5.9 i cili vrau më shumë se 1000 njerëz dhe la dhjetëra mijëra të pastrehë./tvklan.al
