FC Shkupi ka njoftuar ndërprerjen e bashkëpunimit me mesfushorin defanziv Aleks Zllatkov dhe mbrojtësin sllovak Michal Pinter, pas një marrëveshjeje të dyanshme mes klubit dhe futbollistëve.
Zlatkov iu bashkua skuadrës bardhekaltër në verën e vitit 2022 nga NK Triglav i Sllovenisë. Gjatë periudhës së tij në klub, ai ka zhvilluar gjithsej 18 ndeshje, ndërsa sezonin e kaluar kaloi për gjashtë muaj në huazim te Makedonija Gj.P. Pavarësisht rikthimit në Shkup, konkurrenca e lartë bëri që ai të mos gjejë hapësirë të mjaftueshme në ekip.
Michal Pinter, nga ana tjetër, ishte pjesë e FC Shkupit për 18 muaj, duke regjistruar 42 paraqitje, 1 gol dhe 4 asistime. Ai erdhi në ekip në vitin 2023 nga klubi sllovak FC Vion dhe dha kontribut të vlefshëm gjatë qëndrimit të tij.
Klubi falënderon të dy lojtarët për përkushtimin e treguar dhe u uron sukses në karrierën e tyre të ardhshme. FC Shkupi paralajmëron se këto janë vetëm fillimet e ndryshimeve në skuadër, me njoftime të tjera që do të publikohen së shpejti përmes kanaleve zyrtare.
Gjysma e parë e këtij sezoni ka qenë zhgënjyese për FC Shkupin, me probleme të shumta që kulmuan me eliminimin nga Kupa e Maqedonisë. Aktualisht, klubi renditet në pozitën e 6-të në kampionat me 22 pikë. Ndërkohë, pak para përfundimit të gjysmësezonit, skuadra u përball edhe me ndryshime në kryesi, pasi klubi nga Olgun Aydin kaloi në pronësi të Yasin Konyali, me drejtor të përgjithshëm Aykut Turan, ndërsa në postin e drejtorit sportiv u emërua Nderim Nexhipi. /Telegrafi/
