Për më shumë se dy javë tani, Izraeli ka bllokuar pothuajse të gjitha ndihmat ushqimore nga hyrja në veri të Gazës, duke lënë rreth 400,000 palestinezë që jetojnë atje të përballen me urinë, sipas vlerësimeve të OKB-së.
Sulmet izraelite dhe urdhrat e evakuimit të detyruar kanë mbyllur pikat e shpërndarjes së ushqimit, kuzhinat dhe furrat e bukës, shkruan Al Jazeera.
Furra e vetme funksionale në veri të Gazës, e mbështetur nga Programi Botëror i Ushqimit (WFP), u përfshi nga flakët pasi Izraeli e goditi atë me municione.
Çmimet në rritje të ushqimeve
Sipas Al Jazeera, shumicës së njerëzve në Gaza u mungojnë mjetet për të blerë mallra thelbësore dhe varen nga kuzhinat e bamirësisë dhe shpërndarjet e ndihmave për ushqime.
Shumica e tyre kanë humbur punën e tyre pasi ekonomia u godit për shkak të sulmeve të vazhdueshme të Izraelit.
Çfarëdo kursimi në para dhe sende që ata kishin për shkëmbim tanimë u ka mbaruar.
Grafiku i mëposhtëm përmbledh çmimet e ushqimeve në veri dhe jug të Gazës.
Dhe këto çmime mund të luhaten shumë në bazë të disponueshmërisë dhe janë shumë përtej mundësive financiare të njerëzve.
Çmimet e artikujve esencialë janë rritur. Mielli, për shembull, kushton 150 dollarë për një qese 25 kg në jug dhe deri në 1000 dollarë në veri.
Para luftës, një “pako” vezë kushtonte 3.50 dollarë. Tani ajo shitet me 32 dollarë në jug dhe rreth 73 dollarë në veri.
Qumështi pluhur tani shitet në veri për 1 dollarë, për një lugë – ose 124 dollarë për kilogram.
Ndërsa prodhimet e freskëta, përfshirë trangujt dhe domatet, janë ndër më të shtrenjtat pasi Izraeli shkatërroi shumicën e fermave, puseve dhe serave të Gazës.
Ndërkohë disa imazhe satelitore para dhe pas tregojnë gjurmët e automjeteve mbi rajonet dikur pjellore të Beit Lahiya, e cila dikur njihej për luleshtrydhet e saj që vendasit i quanin me dashuri “ari i kuq”. /Telegrafi/
