Të mërkurën më 22 maj do të ketë rivotime në 7 vendvotime në Njësinë e 5-të dhe të 6-të Zgjedhore. Sonte në mesnatë përfundon fushata dhe nis heshtja parazgjedhore.
KSHZ-ja vendosi që më 22 maj të ketë rivotime, sic u tha, për shkak të parregullsive. Vendimi u konfirmua edhe nga Gjykata Administrative, duke hedhur poshtë paditë e Frontit Evropian. U konfirmua se rivotimi mund të ndikojë në rezultatet përfundimtare.
Të mërkurën do të votohet në dy vendvotime në Komunën e Dollnenit, 2 në Krushevë dhe nga një në Strugë dhe Ohër, të gjithë në Njësinë e 5-të Zgjedhore. Do të votohet edhe në një vendvotim në Komunën e Zhelinës në Njësinë e 6-të Zgjedhore.
BDI-ja akuzoi për “inxhinjering zgjedhor” dhe për lojëra politike që Fronti Evropian të mos jetë forca e dytë politike në vend, pasi me rivotimet i rrezikohen dy mandate deputetësh, kurse mund të përfitojnë LSDM-ja dhe koalicioni VLEN.
Ndryshe, partisë më të madhe opozitare në vend, sipas numrit të deputetëve, i takojnë pozitat kyçe në vend – Kryetari i KSHZ-së dhe dy anëtarë, Prokurori Shtetëror, udhëheq me komisionet kyce parlamentare, Drejtori i Televizionit Publik, Agjencia për Komunikimi Elektronike, Agjencia Rregullatore për Energjetikë, Agjencia e mediave e të ngjashme.
Në seancën e së shtunës, KSHZ-ja shkarkoi Kryetarët dhe Anëtarët e Këshillave Zgjedhore Komunale në vendvotimet ku ishin konstatuar parregullsi dhe do të ketë rivotime, por nuk ka informacione nëse do të kërkohet edhe përgjegjësi prej tyre./tvklan.mk
