Bashkimi Demokratik për Integrim përmes një komunikate për media ka reaguar ndaj kryetarit të Lëvizjes Demokratike, Izet Mexhiti dhe deklaratave të tij.
Nga BDI deklaratat e Mexhitit i quajnë shpifje dhe të thëna nën panikun e frikës nga humbja në zgjedhjet presidenciale dhe parlamentare.
Komunikata e plotë:
Izet Mexhitin dhe derivatet tjera të VMRO-DPMNE-së i ka kap sikleti i humbjes së thellë nga Fronti Europian, ndërsa po mundohen të tërheqin vëmendjen se, edhe si humbës, ata mund të jenë pjesë e Qeverisë duke patur parasysh bashkëpunimin e ngushtë me Mickoskin dhe Apasievin e Levicës.
Në vazhdën e shpifjeve dhe nxitjes së panikut, Mexhiti sot ka thënë se “Mickoski dhe LSDM dhe shumë faktorë (bashkëpunëtorët e Kremlinit) po ikin nga BDI”.
I bëjmë me dije Mexhitit dhe derivateve të Moskës se BDI dhe Fronti Europian koalicionon vetëm me qytetarët, ndërsa partnerë i ka SHBA-të dhe Bashkimin Europian.
Ky partneritet do të vuloset më 24 prill dhe 8 maj, kur Fronti Evropian do të kalojë në +20 deputetë.
Njëkohësisht i bëjmë me dije Mexhitit dhe derivateve pro-ruse se korrupsioni dhe krimi ka emër – Komuna e Çairit, e shndërruar tashmë në pronë ilegale të dy-tre vetave, të cilët të frikësuar nga humbja e radhës, po fshihen nën politikat anti-europiane dhe pro-ruse të VMRO-DPMNE-së. /TvKlan.mk
