Partia opozitare VMRO-DPMNE ka ngritur dyshime serioze mbi menaxhimin e fondeve publike dhe zbatimin e kontratave nga Drejtoria e Zonave Zhvillimore Teknologjiko-Industriale (TIRZ), i cili synonte të ndërtonte një fabrikë për prodhimin e makinave ekologjike, duke sugjeruar se ka pasur shpërdorim të mjeteve dhe mungesë transparence.
“Gjëja më e tmerrshme është nëse dhe ku përfundoi ndihma e shpallur shtetërore për këtë gënjeshtër të madhe. Përkatësisht, qeveria vendosi ta mbështesë këtë “investim” me 35 për qind të vlerës së përgjithshme, pra me 42.5 milionë euro para publike. Në prill 2023, media raportoi se investitori Next.E.Go Mobile mori miratimin për ndihmë shtetërore prej 42,585,856 milionë euro sipas raportit të Komisionit për Mbrojtjen e Konkurrencës për vitin 2022. Se ka diçka të dyshimtë në këtë marrëveshje, tregon edhe fakti se kontrata e shtetit me kompaninë investitore mbeti e panjohur për publikun, sepse Qeveria nuk dha pasqyrë të plotë të përmbajtjes së kontratës, e cila ishte nënshkruar në gusht të vitit 2022. Ftojmë institucionet kompetente që të hetojnë në detaje rastin e ndihmës shtetërore për Wfabrikën e makinave elektrike” në Tetovë. Nëse kjo nuk bëhet tani, pas zgjedhjeve dhe ndërrimit të qeverisë, do të bëhet auditimi i plotë i këtij të ashtuquajturi projekti dhe do të kontrollohet nëse dhe ku ka përfunduar çdo qindarkë e parave të popullit”, thanë nga VMRO-DPMNE-së.
Nga ana tjetër, Drejtoria për TIRZ ka hedhur poshtë këto akuza, duke theksuar se asnjë fond publik nuk është paguar ndaj kompanisë në fjalë dhe se procedurat e tyre janë të qarta dhe të rregullta. Ky konflikt vjen pas një periudhe dyvjeçare ku pritshmëritë për investime të mëdha, vende të reja pune dhe një rritje në prodhimin e makinave elektrike nuk u realizuan.
“Partia VMRO-DPMNE hodhi sot dyshime publike për procedurat dhe kapacitetet për realizimin e ndihmës shtetërore, të cilat prekin jo vetëm një, por mbi 40 kontrata të realizuara nga Drejtoria për TIRZ. Me këtë i bëhet një goditje e menjëhershme jo vetëm reputacionit të kompanive që përdorin TIRZ, por edhe standardit të jetesës së afro 20 mijë bashkëqytetarëve tanë që janë të angazhuar drejtpërdrejt në këto kompani. Në interes të zbardhjes së menjëhershme të këtyre dyshimeve dhe akuzave dhe zvogëlimit të dëmit të njerëzve dhe këtyre kompanive, ftojmë publikisht partinë politike VMRO-DPMNE menjëherë dhe pa vonesë që të vijë dhe të kontrollojë të gjithë dokumentacionin e projektit dhe të gjejë qoftë edhe një qindarkë nga paratë publike të paguara për kompaninë”, thuhet në një deklaratë nga Drejtoria.
Situata ka krijuar një atmosferë të tensionuar, me kërkesa për hetime të detajuara dhe auditime të plota të projektit, nëse dhe ku kanë përfunduar paratë e popullit.
