Ish-presidenti i Rusisë, Dmitry Medvedev, tha të shtunën se Moska do të kërkojë “hakmarrje” për sanksionet e mëdha që Perëndimi i ka vendosur kundër saj.
Të premten, Shtetet e Bashkuara dhe Bashkimi Evropian vendosën sanksione të reja kundër Rusisë në prag të dyvjetorit të pushtimit të Ukrainës nga Moska, si dhe pas vdekjes së liderit opozitar rus, Alexei Navalny, në një burg rus.
“Arsyeja [për sanksione] është e qartë: Sa më keq që është për qytetarët rusë, aq më mirë është për botën perëndimore”, tha Medvedev në rrjetet sociale.
“Ne thjesht duhet ta kujtojmë këtë dhe të hakmerremi kurdo që mundemi. Ata janë armiqtë tanë”, shtoi ai.
Bashkimi Evropian e prezantoi dje paketën e 13-të të sanksioneve kundër Rusisë, një ditë para përvjetorit të dytë të nisjes së pushtimit rus të Ukrainës.
“Sot, ne po ashpërsojmë edhe më shumë masat kufizuese kundër ushtrisë së Rusisë dhe sektorit të mbrojtjes”, tha shefi i diplomacisë së BE-së, Josep Borrell, përmes një deklarate për media.
Në të njëjtën ditë, presidenti i Shteteve të Bashkuara, Joe Biden, njoftoi se më shumë se 500 sanksione të reja do të vendosen kundër Rusisë.
“Këto sanksione do të shënjestrojnë individë të lidhur me burgosjen e Navalnyt, por edhe sektorin financiar të Rusisë, atë të mbrojtjes, rrjetet e prokurimit dhe shmangësit e sanksioneve në vende të tjera”, tha Biden.
Navalny, një kritik i zëshëm i Kremlinit, vdiq më 16 shkurt në rrethana të dyshimta në një burg të Arktikut në veri të Rusisë. Ai po vuante një dënim të gjatë për akuza për ekstremizëm që janë cilësuar nga shumë si të nxitura politikisht.
“Ato [sanksionet] do të sigurohen që Putini do ta paguajë një çmim edhe më të lartë për agresionin e tij jashtë vendit dhe për shtypjen brenda vendit”, tha Biden.
Sipas Bidenit, Putin ka bërë “llogari të gabuara” me nisjen e pushtimit të Ukrainës.
Si pasojë e agresionit rus janë vrarë dhjetëra mijëra njerëz dhe janë shkatërruar shumë qytete./REL/
