Prej mëngjesit të sotëm janë hequr të gjitha ndalesat e qarkullimit për mjetet e rënda të ngarkuara për shkak të reshjeve të borës në vend, por rekomandohet që të lëvizni me kujdes dhe të përshtatni shpejtësinë sipas kushteve të rrugës, përcjell KlanM.
Sipas informacioneve nga LAMM dhe nga ndërmarrja publike “Macedonia pat”, ndalimet në vendkalimet malore Pletvar, Strazhë, Gjavato, nga fshati Rogaçevë në vendkalimin kufitar Jazhincë, nga Struga në pikën kufitare Qafë Thanë, si dhe nga Kriva Pallanka deri në vendkalimin kufitar Deve Bair, janë hequr.
Drejtoria për Çështje Hidrometeorologjike njofton për ditën e sotme mot të ndryshueshëm me vranësira me diell dhe më të ftohtë. Paradite kryesisht në pjesët jugore do të ketë kushte për borë lokale. Do të fryjë erë e lehtë deri mesatare, ndërsa në drejtim të rrjedhës së Vardarit erë herë pas here e fortë nga drejtimi verior. Temperatura maksimale do të jetë në intervalin prej -1 deri në 5 gradë.
Më ftohtë mëngjesin e sotëm ka qenë në Anet e Mavrovës ku janë matur -8 gradë, pasuar nga Krusheva me -7 dhe Berova me -5 gradë.
Mbulesa më e lartë e borës është në Dibër dhe Mavrovë (25 centimetra). Në Kodrën e Diellit mbulesa e borës është 21 centimetra, ndërsa në Krushevë një centimetër./KlanMacedonia
