Koalicioni opozitar shqiptar që mban emrin Lidhja Evropiane për NDryshim e që përbeëhet nga Lëvizja Besa, Alternativa dhe Lëvizja Demokratike, kanë bërë apel sot për bashkim në këtë koalicion edhe të subjekteve tjera politke, përveç BDI-së, përcjell KlanM. Nga LEN njoftojnë se kanë pasur takime me kreun e Aleancës për Shqiptarët dhe se dyert e këtij koalicioni për partinë e Taravarit janë të hapura.
“Në kohën që skena politike shqiptare në RMV është ndarë ndërmjet Lidhjes, që synon bashkimin e shqiptarëve për ta bërë rotacionin e shumëpritur politik dhe integrimin e vendit në BE, dhe mes atyre që e kanë kapur vendin dhe e kanë bllokuar integrimin, ndjejmë për detyrim të shpjegojmë se oferta për rritjen e këtij kampi opozitar vazhdon të mbetet e hapur. Me këtë rast dëshirojmë ta njoftojmë opinionin se ne, deri tash kemi pasur disa takime me kreun e Aleancës për Shqiptarët dhe ai e ka të hapur ftesën që të vijë me përfaqësim dinjitoz. Lidhja Europiane për Ndryshim dëshiron t’i sigurojë shqiptarët se fitorja e këtij koalicioni, e mbështetur edhe nga mërgata shqiptare dhe nga faktori relevant shqiptar në rajon, tashmë është evidente dhe këtë ortek nuk ka kush e ndalë”, thonë nga LEN.
Nga LEN sërish fajësojnë BDI-në për pengesa, sipas tyre, rreth anëtarit të KSHZ-së.
“Jo vetëm sondazhet, por edhe fryma e fitores, por dhe mënyra se si sillet BDI-ja kundrejt Lidhjes për anëtarin e KSHZ-së, si edhe mundësitë e krijimit të qeverisë së ardhshme, të gjitha janë dëshmi se nuk është më e diskutueshme tema e fitores, por kjo ia mundëson votuesit të ASH-së të jetë i përfaqësuar në anën që e dërgon BDI-në në opozitë. Tanimë është evidente se zëri i qytetarit shqiptar, përfshirë edhe zërin e aktivistit dhe përkrahësit të ASH-së është pro ndryshimit në skenën politike shqiptare në vend, prandaj bashkimi i ASH-së me Lidhjen, do të mundësojë që fitorja pranverore të jetë edhe më e madhe dhe bindëse”, thuhet më tej në reagimin e LEN./KlanMacedonia
