PRITJE TË GJATA NË KUFIRIN HUNGARI – SERBI
Festat e fundvitit në vendet e Evropës Perëndimore kanë ndikuar që të rritet intensiteti i trafikut nëpër autostradat e rajonit, kurse për fundjavë pritet edhe më shumë të rriten tollovitë dhe pritjet në kufi.
Autoritetet e Serbisë njoftojnë se që mbrëmë kanë nisur tollovitë në vendkalimet kufitare me Hungarinë kurse intensiteti pritet të shtohet gjatë fundjavës.
Në 12 orët e fundit në Serbi, përmes vendkalimit kufitar Horgosh kanë hyrë 9.000 udhëtarë me 35 autobusë dhe 3.500 automjete. Funksionojnë tetë pikëkalime – shtatë për makina dhe një për autobusë.
Autoritetet serbe thonë se për dalje nga Hungaria përmes vendkalimit kufitar Reske pritet rreth dy orë. Situatë e njëjtë është edhe në vendkalimet Horgosh 2, Baçki Vinogradi dhe Kelebija.
Për këtë qëllim, deri në fund të janarit, është vazhduar orari i punës së vendkalimeve kufitare, ku disa prej tyre do të punojnë 24 orë. /KlanMacedonia/
