Akuzohen për korrupsion e shpërdorim detyre
Një aksion i zhvilluar në pikat kufitare në veri të Kosovës ka vënë në pranga 9 zyrtarë. Prokuroria Speciale në koordinim me Doganën e Kosovës dhe në bashkëpunim me Policinë e Kosovës bënë të ditur se nga ky operacion i zhvilluar në 18 zona janë arrestuar tetë doganierë dhe një polic.
’Keqpërdorim i pozitës apo autoritetit zyrtar’’ dhe ‘’Marrja e ryshfetit” janë akuzuar ndaj të ndaluarve. Dyshimet janë bazuar në një hetim të gjatë të udhëhequr nga Prokuroria Speciale dhe të zbatuar nga Dogana e Kosovës dhe Inspektorati Policor.
Hetimet kanë nisur dy vite më parë dhe lidhen me kontrabandën e mallrave që janë zhvilluar në këto pika kufitare, që kryesisht është e banuar me shumicë serbe.
Policia bëri të ditur se janë sekuestruar 20 vula e plumba doganore të Doganës së Kosovës, 10 telefona me katër karta SIM, 1 pistoletë me tre karikatorë dhe 16 municione të paligjshme.
Kjo nuk është hera e parë që autoritetet kryejnë aksion në Doganat e Kosovës për të luftuar veprat penale që lidhen me marrje ryshfeti dhe shpërdorim të detyrës zyrtare. Në mars të vitit 2022, u arrestuan dhjetëra policë dhe doganierë nën dyshimet për marrje ryshfeti dhe keqpërdorim të detyrës zyrtare.
Tv Klan
