Ambasadori evropian në RMV, David Geer, gjatë paraqitjes së djeshme në Sitel tha se teksti për ndryshmin e Kushtetutës është vetëm një shtesë e marrëdhënieve të mira të brendshme ndëretnike e cila nuk bie ndesh me interesin themelor të shtetit.
Ai theksoi se BE nuk do të rinegociojë kornizë të re të negociatave me RMV-në.
“Do të ketë 2 punë që do të jenë thelbësore kur vendi të anëtarësohet në BE. Po e përsëris, së pari partitë politike duhet të bien dakord që reformat e BE-së janë prioriteti kryesor dhe se do t’i vendosin para të gjitha prioriteteve të tjera, se ky duhet të jetë një projekt kombëtar. Nuk është e nevojshme të bësh koalicion, është e shëndoshë të kesh një qeveri dhe një opozitë, por duhet të bien dakord që ky është fokusi kryesor. Kështu përparoi Kroacia në vitet e vështira të zbatimit të agjendës. Dhe gjëja e dytë lidhet sërish me atë që unë e quajta “projekt kombëtar”, që është ajo ambicie dhe vendosmëri për të ecur përpara me reformat duke rrjetëzuar të gjitha institucionet: Qeverinë, Parlamentin, drejtësinë, policinë…çfarëdo që keni. Nëse gjërat vendosen kështu, data është arritur, por duhet të zbatohen reformat të cilat vetë qytetarët i kërkojnë, tha Geer në një intervistë për Sitel TV.
Ai shtoi se fjalimi i Presidentit të Këshillit Evropian, Charles Michel në Bled ishte inkurajues dhe jo një dush i ftohtë. Ai vlerësoi se ishte një fjalim që u pasqyrua edhe në deklaratat e dhënë nga Varhelyi që i bëri më vonë, për urgjencën dhe nevojën për të ecur përpara.
“Është e vërtetë që Presidenti përmendi vitin 2030 dhe vetë Presidenti Macron thekson gjithmonë rëndësinë e zgjerimit nga perspektiva e progresit, stabilitetit dhe sigurisë. Ajo që më habit gjithmonë është se ata që komentojnë, arrijnë t’i kthejnë shanset pozitive që paraqiten, në diçka krejtësisht të kundërt, e zeza bëhet e bardhë, e bardha bëhet e zezë. Ky është një shans, ky është një mesazh i qartë për vendet kandidate që ne i duam ata brenda, se e duam këtë vend, Maqedoninë e Veriut në BE, ja mundësia juaj, ky është plani”, tha Geer.
