BDI e Ali Ahmetit shprehet thellësisht e indinjuar me fushatën, sipas tyre, politike dhe mediatike kundër Universitetit të Tetovës, por edhe vetë partisë së Ahmetit. Nga kjo parti, siç përcjell KlanM, thonë se arsimi publik universitar është një ndër shtyllat kryesore për të ndikuar në avancimin e proceseve të rëndësishme shoqërore.
Në reagimin e BDI-së, thuhet se kjo parti ka mbështetur lirinë akademike dhe autonominë e universiteteve.
“Në këtë periudhë, në vendin tonë janë realizuar procese zgjedhore në 4 institucione publike të arsimit të lartë në përputhje me autonominë universitare. Fushata e vazhdueshme mediatiko-politike kundër universitetit është për çdo keqardhje dhe apelojmë për ndërprerje të menjëhershme të fushatës dhe denoncim institucional të çdo shqetësimi nga cilado palë. Ftojmë profesoratin dhe organet udhëheqëse të Universitetit të Tetovës të ndjekin dhe respektojnë me përpikmëri Ligjin për arsim sipëror, posaçërisht nenin 97, si dhe statutin e Universitetit të Tetovës në realizimin e përpiktë të procesit zgjedhor brenda institucionit dhe të mundësojnë transparencë të plotë të konkursit të datës 31 maj 2023 për zgjedhjen e Rektorit të Universitetit të Tetovës për mandatin 2023-2026”, thuhet në reagimin e BDI-së.
Poashtu, siç përcjell KlanM, BDI fton të gjithë kandidatët për rektor të paraqesin para organeve kompetente çdo parregullsi, në qoftë se, sipas tyre, ekzistojnë dëshmi për ndikime të ndryshme.
“BDI është e bindur që integriteti i profesorëve është i pacënueshëm dhe që secili do të jep votën e vet me bindje të lirë, në mënyrë demokratike. Universiteti i Tetovës mban vulën e luftës për dije dhe historiku i saj duhet të jetë mision për gjeneratat e ardhshme, për çka duhet komuniteti të bëjë maksimum për ta mbrojtur. Bashkimi Demokaratik për Integrim mbështet çdo iniciativë që vjen nga ana e institucioneve publike të arsimit të lartë për të rritur cilësinë dhe do të mbështes çdo ndryshim ligjor në të mirë të procesit edukativo-arsimor”, thuhet më tej në reagimin e BDI-së./KlanMacedonia
