Rusia jo vetëm që nuk e zbatoi kërcënimin e saj për të reduktuar prodhimin e naftës në shenjë hakmarrjeje për sanksionet perëndimore, por rriti në mënyrë dramatike eksportet e saj, me Kinën dhe Indinë si përfituesit kryesorë. Në mars, Kremlini tha se synonte të shkurtonte prodhimin e naftës me 500 mijë fuçi në ditë dhe të ruante nivelet e reduktuara deri në fund të vitit. Ministria ruse e Energjisë pretendon se me të vërtetë ka ulur prodhimin në nivele afër objektivit. Megjithatë, të dhënat nga lëvizjet e cisternave tregojnë se eksportet ruse të naftës nga deti janë rritur, ndërsa rafinimi i brendshëm bruto sapo ka filluar të bjerë për shkak të punimeve të mirëmbajtjes së rafinerisë.
Sipas Agjencisë Ndërkombëtare të Energjisë – IEA, prodhimi rus i papërpunuar në prill arriti në rreth 9.6 milionë fuçi në ditë, një vëllim që është vetëm 200 mijë fuçi në ditë më pak se nivelet e prodhimit të shkurtit dhe për këtë arsye nuk konfirmon synimin e Kremlinit për të ulur prodhimin. Në vend të kësaj, IEA e konsideron të mundshme që Rusia të ketë rritur prodhimin për të kompensuar të ardhurat e humbura. Në prill, të ardhurat e Rusisë nga eksportet e naftës u rritën me 1.7 miliardë dollarë në 15 miliardë dollarë, megjithëse ishin ende 27% në rënie krahasuar me të njëjtën periudhë të vitit të kaluar.
Siç thekson IEA, Rusia eksportoi shumë më tepër naftë në prill sesa kishte eksportuar në çdo muaj që nga pushtimi i saj në Ukrainë. Eksportet ruse të naftës arritën në 8.3 milionë fuçi në ditë, shumë më tepër se mesatarja prej 7.7 milionë dhe 7.5 milionë fuçi në ditë në 2022 dhe 2021 respektivisht.
Pothuajse 80% e këtyre eksporteve ishin të destinuara për në Kinë dhe Indi. Siç komentojnë analistët e industrisë, kjo rritje e eksporteve të saj pasqyron suksesin e Moskës në gjetjen e klientëve të rinj për naftën e saj që kur Europa ndaloi importet, por edhe në gjetjen e anijeve të reja, duke qenë se ka humbur për shkak të sanksioneve aksesin në cisternat e ekonomive perëndimore.
/ SCAN
