PARTIA SHPALL ZGJEDHJET PËR DEGËT, ÇAIRI DHE SARAJI ME KRYETAR TË RINJ?
Pa dhënë shpjegim të saktë se në bazë të cilës pjesë të statutit thirren, Kryesia qendrore e BDI-së ka vendosur që të përjashtojë pesë anëtarë nga partia. Në Kumtesën e lëshuar nga Reçica e vogël është përdorur termi vetëpërjashtim.
“Kryesia Qendrore konstaton dhe shpreh keqardhje të thellë për vendimin e pesë anëtarëve të kryesisë për vetëlargim nga Kryesia Qendrore e Bashkimit Demokratik për Integrim, vendim që ata e morën në mbledhjen e KQ në 1 Prill 2023” – thonë nga BDI.
Vetë Kryetari i BDI-së, Ali Ahmeti në prill të këtij viti deklaroi se fraksionet në BDI nuk lejohen sepse nuk janë pjesë e statutit të partisë, e kjo e bën fraksionin që e shpallën Grupi i zjarrit organizim politik inekzistent.
“BDI është parti që respekton vlerat dhe demokracionë gjithashtu edhe mendimin kundër. Sa i takon fraksionit unë kam pasur një tentim të tillë në kongres por me vota humba , sipas vendimeve të kongresit nuk lejohet të ketë fraksione dhe andaj nuk do vazhdojë kjo por duhet të pritet deri te Kongresi i radhës, çdo veprim ndryshe nga statuti është anarki, anarkia është kundër demokracisë, pra parimi është pakica i bindet shumicës” – tha Ali Ahmeti.
Nga Grupi zjarrit pritet që të dalin me qëndrim, por burime brenda këtij grupi thonë që edhe ata e kanë të paqartë vendimin e partisë.
Në të njëjtën mbledhje, Kryesia e BDI-së ka shpallur edhe zgjedhjet në degët e partisë që duhet të mbahet më 2 korrik të këtij viti. Në të njëjtën seancë kur përjashtohen kryetarët e degës së Sarajit dhe ai i Çairit, shpallen zgjedhjet për kryetarë të degëve. Mbetet të shihet se a do të ketë dhe se a do t’iu mundësohet të përjashtuarve që të marrin pjesë në këto zgjedhje. /KlanMacedonia/
Përgatiti: Furkan Saliu
