Rusia, Kina dhe Afrika e Jugut filluan sot stërvitjet e përbashkëta ushtarake në Oqeanin Indian, në afërsi të bregut të Afrikës së Jugut, duke demonstruar lidhjet e tyre të ngushta në mes të pushtimit të Rusisë në Ukrainë dhe marrëdhënieve të tensionuara të Kinës me Perëndimin.
Stërvitjet 10-ditore, të quajtura “Mossi II”, do të përkojnë me përvjetorin e parë të pushtimit rus të Ukrainës më 24 shkurt, ndërsa qasja në media do të kufizohet. Të tre vendet mbajtën stërvitjet detare “Mossi I” në Kejptaun në 2019.
Fregata ruse “Admiral Gorshkov” mbërriti në Kejptaun këtë javë, me shkronjat “Z” dhe “V”, të përdorura për të simbolizuar pushtimin rus të Ukrainës.
Ardhja e fregatës ruse ka shkaktuar polemika në publikun ndërkombëtar, pasi ajo është e pajisur me raketat më të fundit hipersonike Zirkon, për të cilat Rusia pretendon se “mund të depërtojnë çdo mbrojtje kundër raketave në det dhe në tokë”. Raketa është planifikuar të testohet gjatë stërvitjeve.
