Kuvendi i Republikës së Maqedonisë së Veriut konfirmoi sot dorëheqjet e ministrit të Drejtësisë Nikolla Tupançevski dhe ministrit të Mjedisit Jetësor Naser Nuredini, si dhe zëvendësministrave të Shëndetësisë Vladimir Rendevski dhe Drejtësisë Agim Nuhiu.
Siç ka njoftuar kryetari i Kuvendit Talat Xhaferi, Tupançevski, Nuredini, Rendevski dhe Nuhiu kanë vendosur që të mos i arsyetojnë dorëheqjet deputetëve.
“Konstatoj se Tupançevskit, Nuredinit, Rendevskit dhe Nuhiut, u ndërpriten funksionet”, theksoi Xhaferi.
Para fillimit të seancës së 103-të, deputetët me një minutë heshtje nderuan viktimat e tërmeteve në Turqi dhe Siri.
