Trajtim të shpejtë të numrit të azilkërkuesve në Britani
Kryeministri britanik Rishi Sunak po synon të arrijë një marrëveshje me Francën për të adresuar numrin e paprecedentë të emigrantëve të paligjshëm që synojnë të kalojnë ilegalisht Kanalin e La Manshit.
Ministrat dhe zyrtarët pritet të shqyrtojnë një projekt-marrëveshje e cila përfshin objektivat për anijet që ndalojnë në Mbretërinë e Bashkuar dhe numrin e oficerëve francezë që patrullojnë zonat bregdetare në çdo kohë.
Raportohet se do të ketë objektiva të reja për stafin e zyrës së brendshme që gjurmon emigrantët “Home Office” për të përpunuar 80% të kërkesave për azil brenda gjashtë muajve. The Guardian duke cituar burime pranë qeverisë britanike bën të ditur se stafi mund të marrë shpërblime nëse ata përmbushin objektiva të caktuara.
Zyrtarët e Home Office po planifikojnë gjithashtu të shtrëngojnë rregullat se kush kualifikohet për azil në Britani për të reduktuar numrin e aplikantëve, një masë e diskutueshme që Sunak propozoi gjatë zgjedhjeve të lidershipit konservator gjatë verës.
Një numër i paprecedentë azilkërkuesish kanë mbërritur me varka të vogla këtë vit, me shifrën që ka arritur në 33,573 që nga 3 Tetori. Vitin e kaluar ka pasur 28,526 mbërritje me varka të vogla dhe në 2020 ishin 8,404.
Tv Klan
