Gjendja e 6 të plagosurve nga shpërthimi i ndodhur të Premten në Lushnjë është e stabilizuar.
Siç raporton gazetarja e Klan News Anila Sefa, njëri prej tyre Ervis Sharka ka dalë nga spitali rajonal i Lushnjes ditën e sotme dhe do të mjekohet në banesë.
Tashmë pritet që në vendngjarje të hiqet bombula e mbetur e oksigjenit e varur në vinç, pasi paraqet rrezikshmëri të lartë dhe Njësia Antieksploziv ka kërkuar ekspertë shtesë.
Këto janë informacionet e siguruara deri në këtë moment, ndërsa pritet që ngjarja të zbardhet e plotë. Kujtojmë se pasditen e djeshme, prej shpërthimit humbën jetën babë e bir të cilët po punonin në këtë kantier, Roland dhe Elidon Hoxha. Ndërkohë i shtruar te “Trauma” është deputeti Bujar Çela dhe një 42 vjeçar, të cilët i janë nënshtruar mbrëmë ndërhyrjeve kirurgjikale.
Paraprakisht dyshohet se ka qenë kontakti i vinçit me linjën e tensionit të lartë që ka shkaktuar shpërthimin e fuqishëm, duke qenë se po punohej për lëvizjen e 6 bombulave të oksigjenit. Shpërthimi i fuqishëm pati pasoja disa kilometra larg zonës ndërsa zhurma u ndje thuajse në gjithë qytetin./tvklan.al
