Zgjat për gjashtë muaj dhe do të lejojë qeverinë e Meloni të riatdhesojë me shpejt refugjatët e paligjshëm
Me një rezolutë të Këshillit të Ministrave, Italia shpall gjendjen e jashtëzakonshmekombëtare për refugjatët e paligjshëm. Gjendja e jashtëzakonshme do të mbështetet nga financimi fillestar prej 5 milionë Euro dhe do të zgjasë për gjashtë muaj.
Masa do të lejojë qeverinë e krahut të djathtë të Giorgia Melonit të riatdhesojë më shpejt ata që nuk lejohen të qëndrojnë në Itali, duke rritur urdhrat e dëbimit. Shoqatat e të drejtave të njeriut kanë akuzuar qeverinë italiane për kushtet çnjerëzore dhe degraduese në të cilat strehohen emigrantet e paligjshem.
Qeveria, në detyrë që nga Tetori, është zotuar të frenojë imigracionin masiv, por rreth 31,300 emigrantë kanë mbërritur në Itali deri më tani në vitin 2023, nga rreth 7,900 në të njëjtën periudhë të vitit të kaluar.
Në fillim të kësaj jave roja bregdetare udhëhoqi operacionet e shpëtimit që përfshinin dy varka që mbanin gjithsej 1200 refugjatë kryesisht nga Lindja e Mesme dhe Afrika. Ndërkaq një anije me 700 emigrantë ka mbërritur në Katania pavarësisht vendosjes së gjendjes së jashtëzakonshme.
Pas mbytjes së një anije në rajonin jugor italian të Kalabrisë në fund të shkurtit, Meloni i kërkoi Bashkimit Evropian të bëjë më shumë për të ndaluar imigracionin e paligjshëm, pasi ajo ashpërsoi ligjet për kontrabandistët e qenieve njerëzore për të cilët kërkoi deri në 30 vjet burg. Gjendja e fundit e jashtëzakonshme për emigrantët u vendos në vitin 2011, gjatë qeverisë së katërt të Silvio Berlusconit.
Klan News
